С.Дөлгөөн
Аль жил гаруйн өмнө л үүдээ барьсан “Анод” банкны хэрэг одоо болтол шийдэгдээгүй байна. Захирлуудынх нь эрүүгийн хэргийн мөрдөн байцаалт дуусаагүй бол аль өнгөрсөн сард л дампуурлыг нь албан ёсоор зарлана гэж байсан ч нам гүм байсаар байгаа.

Энэ хооронд хувьцаа эзэмшигчид нь түр хороо байгуулж, өөрсдийнхөө эрх ашгийг хамгаалах талаар дуугарч эхэлсэн. Уг нь 1300 гаруй хувьцаа эзэмшигчийн хохирлыг барагдуулна хэмээн 2009 онд л Монгол банкныхан ярьж байсан. Хаалтынх нь ханш буюу нэг ширхэг хувьцааг 586 төгрөгөөр бодож 10 орчим тэрбум төгрөгийг хувьцаа эзэмшигчдэд төлнө гэж байсан ч энэ асуудал өдий болтол тодорхой шийдэгдсэнгүй. Эх сурвалжуудын мэдээлж байгаагаар Сангийн яам, Монгол банк, Санхүүгийн зохицуулах хороо хамтран хохирлыг барагдуулна гэж байгаа ч гол буруутан нь СЗХ учир тэд хохирлыг нь барагдуулах ёстой хэмээн үзэж байгаа аж. Харин СЗХ-нд 10 тэрбум төгрөг байхгүй тул энэ талаар УИХ-ын хаврын чуулганд хандахаар болсон байна. УИХ-аас зөвшөөрвөл 10 тэрбум төгрөгийн хохирлыг барагдуулах бололтой.
“Анод” банкны дампуурлыг хэзээ зарлах нь бас л тодорхойгүй байгаа юм. Ямар ч байсан Монгол банкны эх сурвалжийн мэдээлж байгаагаар энэ сардаа багтаан дампуурлыг зарлана гэж байгаа ч хувьцаа эзэмшигчдийн хохирлыг барагдуулахаас нааш дампуурлыг нь зарлаж болохгүй байгаа сурагтай.