О.Болор-Эрдэнэ
Нярайн халдвар гарч хаагдаад байгаа нэгдүгээр амаржих газрын их засвар энэ сарын 6-нд эхэлжээ. Нэгдүгээр амаржих газрын дарга Д.Энхбаяраас засварын талаар тодруулахад, барилгын зургаан компани засварын ажлыг гүйцэтгэж байна.

Эрүүл мэндийн сайд С.Ламбаагийн шийдвэрээр тавдугаар сарын  10-нд их засварыг дууссан байх ёстой. Хугацаанд хавчигдаж засварыг чанаргүй хийх вий гэдэгт бид болгоомжилж байна. Тиймээс засварын чанарт онцгой анхаарна гэж ярилаа. Харин тус амаржих газрын ерөнхий инженер н.Бүрэнбаатарын хэлснээр засвар эхлээд удаагүй учраас хүндрэлтэй асуудал одоохондоо байхгүй аж. Барилгын хана, туургыг буулгах ажил хийгдэж байна. Гол засварын ажил эхлээгүй байгаа. Гүйцэтгэгч талуудтай нарийн төлөвлөгөө гаргаж, уялдаа холбоотой ажиллахаар болсон гэв. Нэгдүгээр амаржих газрын засварын чанарт нийслэлийн Барилга хот байгуулалт, төлөвлөлтийн газар хяналтыг давхар тавьж ажиллах юм. Ташрамд дурдахад, нэгдүгээр амаржих газар нь 1968 онд ашиглалтад орсноос хойш их засвар огт хийгдэж байгаагүй аж.
Нярайн халдварын дуулианаар тус амаржих газрыг бүрэн засварлахаар болж, Засгийн газрын нөөц хөрөнгөнөөс хоёр тэрбум гаруй төгрөг гаргаж байгаа юм.