Хятад улс Копенгагены олон улсын тунхаг бичигт нэгдэхээр болжээ. Цаг агаарын өөрчлөлтийн асуудлаарх олон улсын баримтад нэгдэн, гарын үсэг зурахаар зөвшөөрснөөр хүн төрөлхтний өмнө тулгараад байгаа тулгамдсан асуудал нэг шатаар боловч ахилаа.

Өнгөрсөн оны 12 дугаар сард Данийн нийслэл Копенгаген хотноо дэлхийн улс орнуудын төр засгийн тэргүүлэгчид хуран чуулж, дэлхийн цаг агаарын өөрчлөлт, агаар мандалд цацагдаж байгаа хүлэмжийн хийн хэмжээг бууруулах асуудлыг хэлэлцэн, Копенгагены тунхаг бичгийг батлан гаргасан юм. Энэхүү тунхагт нэгдэж байгаа улс орнууд нь энэ оны сүүлч гэхэд Копенгагены тунхагийг батлан, хууль эрхзүйн үүднээс хүчин төгөлдөр мөрдөх нөхцлийг бүрдүүлэх үүрэг хүлээжээ. Киотогийн протоколыг орлох дээрх баримтад Хятад улсаас өмнө Энэтхэг мөн нэгдэж байгаагаа мэдэгдсэн юм. Энэтхэгийн байгаль орчны сайд энэ талаар улсынхаа парламентын танхимд хандан мэдэгдсэн байна. Копенгагены бага хуралд оролцогсод хуульзүйн зайлшгүй үүрэг хүлээлгүйгээр, эхний ээлжинд цаг агаарын дулааралтай тэмцэхэд анхаарч ажиллахаар үүрэг хүлээсэн. Энэ нь 2050 он гэхэд дэлхийн цаг агаарыг дунджаар хоёр градусаар бууруулж, хөгжингүй орнууд буурай хөгжилтэй орнуудад цаг агаар өөрчлөгдөхөд нөлөөлж байгаа хүчин зүйлийн төлөө нөхөн олговор төлөхөөр тусгажээ. Дэлхийн хамгийн их хүн амтай, аж үйлдвэрлэл өндөр хөгжиж байгаа Энэтхэг, Хятад улсууд Копенгагены баримтад нэгдэж байгаа нь томоохон алхам гэдгийг мэргэжилтнүүд онцлон тэмдэглэж байна.