2008 оны долдугаар сарын нэгний үйл явдлаас хойш жагсаал цуглаан гэж дуугарахаа байсан Ж.Батзандан, О.Магнай нар Иргэний нэгдсэн холбоог байгуулсан. Холбооны зүгээс өнөөдөр жагсаал хийнэ гэдгээ мэдэгдээд байгаа билээ. АН-ын далбаанд нэгдэж, амиа хоохойлсон тэднийг ямар нүүрээрээ жагсаал зохион байгуулах гэж байгаа юм бол гэх хүн олон байгаа.

Харин холбооныхны зүгээс улс төрчдийг шүүх ард түмний анхдугаар хурлыг зохион байгуулна гэж байгаа. МҮЭСТӨ-нд 11.00 цагаас болох уг хурлаар ард түмний санал асуулгаар бохир улстөрчдийг тодруулах гэнэ. Үүний дараагаар Сүхбаатарын тайлбайд жагсаал зохион байгуулж, Төрийн ордныг гурван удаа тойрч, шаардлагаа хүргүүлэх юм.
Жил гаруйн хугацаанд тайван байсны эцэст дахин жагсаал цуглаан зохион байгуулах болсон нь хүчний байгууллагынхныг багагүй сандаргаж байгаа бололтой. Цагдаагийн байгууллага өнөөдөр өндөржүүлсэн бэлэн байдалд ажиллах бөгөөд жагсаал цуглааны үеэр хамгаалалт, хяналт тавих аж. Харин энэ жагсаалыг эсэргүүцсэн Нийгмийн сэтгэл зүйн хүрээлэнгийнхэн өчигдөр сэтгүүлчдэд хандсан юм. Нийгмийн сэтгэл зүйг эвдэхийг хүсч, ард түмэн, нийгмийн дунд сөрөг нөлөө үзүүлж байгаа Ж.Батзандан, О.Магнай нарыг шүүхэд өгнө гэдгээ тус хүрээлэнгийн захирал Д.Одгэрэл хэллээ.