С.Дөлгөөн
Өнгөрсөн бямба гаригт буюу энэ сарын зургаанд Увс, Ховд, Баян-Өлгий аймгийн нутгийг хамарсан хүчтэй газар хөдлөлт болсон байна. Газар хөдлөлтийн төв нь дээрх аймгуудын зааг буюу Увс аймгийн Өмнөговь сумаас урагшаа 24 километрт Алтанхөхий уулын зүүн хойд үзүүрт байжээ.

10 метрийн гүнд 4.9 магнитутын хүчтэй газар хөдлөлт болсон хэмээн Одон орон, геофизикийн судалгааны төвийн Газар хөдлөлтийг судлах сектороос мэдээлж байна. Өглөөний 08.33 цагт болсон газар хөдлөлтийн чичиргээ Ховд хот, Улаангом хот болон хэд хэдэн суманд мэдрэгджээ. Одон орон, геофизикийн судалгааны төвд ирсэн мэдээллээр газар хөдлөлтийн төвдөө өнгөн хөрсөнд бага зэргийн хагарал үүссэн гэсэн байна. Хөдөө газар болсон болохоор ямар нэг хохирол учраагүй ч Улаангом хотод байрлах “ХААН” банкны байшингийн хананд цууралт үүссэн гэнэ.
Энэ талаар ОБЕГ-аас лавлахад, “Одоогоор ямар нэг хор хохирол болон байшинд цууралт үүссэн, гадаргын хөрсөнд цууралт өгсөн гэсэн мэдээлэл бичигдээгүй байна” гэсэн юм.   Алтанхөхий нуруу нь есөн баллын хүчтэй газар хөдлөлтийн бүсэд хамаардаг, байнгын идэвхитэй голомт газарт тооцогддог байна.