“Бүх нийтийн хөгжмийн боловсролын төлөө хамтдаа” уриатай ажиллаж буй Улсын Филармонийн Морин хуурын чуулга энэ сарын 18-нд нэгэн шинэлэг тоглолт хийх гэж байна. Үргэлж шинийг эрэлхийлж киноны дуугаар хүртэл тоглолт хийгээд авсан тэд энэ удаад  дэлхийн хөгжмийн дээжсээс монголчууддаа толилуулах юм байна. 

Өөрөөр хэлбэл А.Хачатуряны “Охидын бүжиг”, В.А.Моцартын “Серенада”, Ж.Бизегийн “Антракт” зэрэг дэлхийд цуутай олон бүтээлээр монголчуудын сонорыг мялаана.  Дэлхийн хөгжмийн хөгжлийн түвшин цаг үеэрээ хөгждөг  гэдэг. Тийм учраас үе үед зохиогдсон, хүмүүсийн сонсох дуртай хөгжмийн бүтээлүүдийг энэхүү тоглолтын үеэр сонсохын зэрэгцээ тэдгээр бүтээлүүд нь Морин хуурын чуулгад хэрхэн зохицож байгаа, уран бүтээлчид  нь хэрхэн эзэмшин тоглож буйг “Дэлхийн хөгжмийн дээжис” тоглолтоос үзэх боломжтой.
“Дэлхийн соёлын өвд Монгол улсын нэрээр бүртгэгдсэн Монголын ард түмний оюуны суут бүтээл, өмч болсон морин хуурын уянгат  аялгуу Монголын хөгжмийн ертөнцөд нэн чухал үүрэг, ач холбогдолтой болохыг энэхүү концерт батлан харуулах юм” хэмээн тоглолтыг зохион байгуулагчид ярьсан.