Э.Амина
“Ванкувер 2010” өвлийн олимп ард хоцорч, 17 хоногийн туршид хурд хүч, авхаалж самбаагаа сорьсон тамирчид гэр гэрийн зүг хүлгийн жолоо залсан. Тус олимпид түүхэндээ байгаагүй муу амжилт үзүүлсэн гэж дүгнүүлж байгаа Оросын баг тамирчид эх орондоо ирээд байна.

Шилдэг тамирчид нь ч төдийлөн сайн амжилт үзүүлж чадаагүйг спорт сонирхохгчид сайн мэдэж байгаа биз ээ. Энэ байдалд дүгнэлт хийж, тамирчдын бэлтгэл сургуулилтад зохих ёсоор анхаараагүй, тэднийг амжилт гаргахад нөлөөлж чадаагүй эрх мэдэлтнүүдээс Оросын төр засаг хатуухан хариу нэхэх бололтой. ОХУ-ын Ерөнхийлөгч Дмитрий Медведев Ванкуверын олимпийн наадамд оролцсон баг тамирчдын бэлтгэл сургуулилтыг хариуцан ажилласан спортын хороод, байгууллагын удирдлагыг сайн дураараа огцрохыг хүсчээ. Хэрэв тэдгээр хүмүүс сайн дураараа ажлаа өгч чадахгүй бол тэдэнд туслаж болох юм хэмээн Медведев хатуухан мэдэгдсэн байна. ОХУ-ын Төрийн тэргүүн энэ мэдэгдлийг мягмар гаригт болсон эрх баригч намын хурал дээр хэлж, Нэгдсэн Оросын тэргүүн Борис Грызлов ирэх 2014 оны Сочигийн олимпид оролцох баг тамирчдын бэлтгэлд төр засгаас онцгой анхаарал тавьж, өөрийн хяналтанд авахаа амлажээ. Медведев спортод амжилт гаргахад хөрөнгө мөнгө чухал хэдий ч, бүгдийг шийддэггүй. Тиймээс ирэх олимпид спортын хороод, байгууллага мөнгө, хөрөнгөд бус тухайн тамирчны амжилт, хувь хүн дээр төвлөрөн ажиллахыг хатуухан сануулсан байна. Спортын хороод заримдаа их зантай, хүнд сурталтай ажилладгийг  ч мөн сануулжээ. “Канадын Ванкувер хотод болсон өвлийн XXI олимпид Оросын баг тамирчид нийт медалийнхаа тоогоор 11 дүгээрт жагсаж, ердөө гуравхан алтан медальтай эх орноо зорьсон. Оросууд хамгийн их найдвар тавьдаг спортын төрлүүд болох уран гулгалт, бобслей, чарга, хоккейн спортод амжилт гаргаж чадаагүй юм. Гол спортын төрлүүдэд медальгүй хоцорсноор Оросууд түүхэндээ байгаагүй муу амжилт үзүүлжээ.