Сар шинийн өмнөхөн нийслэлийн тэргүүний байгууллага, дүүрэг, хороод шалгарч, хотын удирдлагуудаас шагналаа гардан авлаа. Өнгөрсөн оны үйл ажиллагааны үр дүнд хийсэн хяналт, шинжилгээний дүнг харгалзан бүрэн хангалттай, хангалттай гэсэн үнэлгээгээр нийслэлийн шилдгүүдийг тодруулдаг уламжлалтай.

2009 оны үйл ажиллагааны үр дүнгийн бодлогын зорилт, дүрмээр хүлээсэн үүргээ бүрэн хангалттай биелүүлсэн байгууллагуудаар нийслэлийн Засаг даргын Тамгын газрын Хотын хөгжлийн бодлогын хэлтэс, Үйлдвэрлэлийн хэлтэс, Хяналт шинжилгээ, үнэлгээний хэлтэс, Санхүү, төрийн сангийн хэлтэс, Цэргийн штаб, Хэвлэл мэдээллийн алба, Захирагчийн Ажлын Албаны Инженерийн байгууламжийн хэлтэс, УСУГ, ОСНААУГ, Татварын газар, Статистикийн газар, Газрын Алба, Нийгмийн даатгалын газар, Яаралтай тусламжийн төв шалгарсан юм. Харин бүрэн хангалттай үнэлгээ авсан дүүрэг байхгүй бөгөөд есөн дүүрэг хангалттай гэсэн дүн авчээ. Мөн Баянгол дүүргийн есдүгээр хороо, Налайх дүүргийн нэгдүгээр хороо, Чингэлтэй дүүргийн 11 дүгээр хороо зэрэг есөн хороо бүрэн хангалттай үнэлгээ авч, нийслэлийн тэргүүний хороод боллоо. Хот тохижилтын газар, Барилга, хот байгуулалт, төлөвлөлтийн газар, Бүртгэлийн газар, Авто замын газар, Онцгой байдлын газар,  Мэргэжлийн хяналтын газар, Өмчийн харилцааны газар, Архивын газар,  Цагдаагийн газар, Нийтийн тээврийн газар, Соёл урлагийн газар, Эрүүл мэндийн газар, Усны барилга байгууламжийн газар зэрэг байгууллага хангалттай дүн авсан байна. Мөн энэ үеэр өмнөө тавьсан зорилгоо амжилттай биелүүлж, сайн ажилласан Баянзүрх, Чингэлтэй, Баянгол дүүргүүдийг НИТХ, Засаг даргын хамтарсан өргөмжлөлөөр шагнасан юм. Өнгөрсөн оны ажлаараа бусдаасаа тэргүүлсэн байгууллагуудыг шалгаруулахаас гадна ажил сайжруулах шаардлагатай байгууллагуудыг ч нэрлэсэн. Улаанбаатар зам засвар, арчлалт компани, Боловсролын газар, Агаарын чанарын алба, Хүүхдийн төлөө газар, Мал эмнэлгийн газар, Монголын Хүүхдийн ордон, II амаржих газар, Гэрлэх ёслолын ордон, Соёлын төв өргөө, Амьдрах ухаан, сургалт үйлдвэрлэлийн тусгай төв, Хүүхдийн сургалт хүмүүжлийн тусгай төв зэрэг байгууллага ажил сайжруулах шаардлагатай гэсэн үнэлгээг авсан байна. Шагнал гардуулсны дараа нийслэлийн Засаг дарга хэлсэн үгэндээ “Шалгалтын комиссын шалгуурыг давж, хангалттай үнэлгээ авсан байгууллагуудад баяр хүргэе. Энэ жил ажил сайжруулах үнэлгээ авсан байгууллагууд ирэх жил хангалттай үнэлгээ авна гэдэгт итгэлтэй байна” гэдгийг онцолж байлаа.